شط الهوا

بما إنى إسكندرانيه , حبيت إن اول موضوع ليا هنا بعد التعارف يكون عن إسكندريه

إسكندريه بالنسبه لى اكبر من مجرد مدينه , واكبر من مجرد المكان الى اتولدت واتربيت فيه , وشربت من ماؤة وتنفست هواءة زى ما كتب القراءة بتاعه إبتدائى بتعلمنا .. إسكندريه خليط معقد من الحب والشجن والرومانسيه إتخلطو ببعض وكونوا لنا هوا اسكندريه الى يرد الروح

حتى سكان إسكندريه هما مزيج من اليونان والمصريين والفراعنه .. لحد ما أصبح سكان إسكندريه هما كمان منفردين من بين سكان أى مدينه فى العالم .. وفى رايى الشخصى إنتماء الواحد لإسكندريه هو إنتماء نابع من الجينات الوراثيه مش لمجرد إنه إتولد وعاش فى المكان دة .. ولحد النهردة نلاقى أن كل مواطن سكندرى جواة روح خاصه مش بتلاقيه غير فيه

طيب هسألكو سؤال وجابو بأمانه .. عمركم شفتم مدينه بيتعمل كم هائل من الاعمال الفنيه بإسمها ؟ مش مصدقنى ؟ طب عد معايا : فيلم اسكندريه ليه واسكندريه كمان وليه إسكندريه كمان وإسكندريه نيويورك ليوسف شاهين , وأغنيه شط أسكندريه لفيروز .. دة غير اغانى كتير اسكندريه كانت جزء منها زى اغنيه احسن ناس لداليدا .. دة غير طبعا الى انا مش فاكراه

بالذمه دة عشق عادى ؟

أنا بحب إسكندريه .. وأكيد انتو كمان بتحبو أسكندريه .. هو فى حد يقدر ميحبش أم الدنيا ؟ مظنش